Debido ás últimas previsións meteorolóxicas, que indican temperaturas elevadas durante a mañá do domingo en Friol, podendo acadarse os 31 ºC nas horas centrais do día, cun índice UV previsto de 10 e vento do sur con refachos que poderían alcanzar os 30 km/h, a organización decidiu introducir algúns axustes no percorrido longo co único obxectivo de reforzar a seguridade de todas as persoas participantes.

O trazado inicialmente previsto percorría durante máis tempo o cordal de Ousa, unha zona especialmente exposta á calor e ao vento. Por prudencia, optouse por unha variante que permite mellorar tanto a asistencia como a hidratación dos sendeiristas, reducindo a exposición ás condicións meteorolóxicas máis desfavorables.

Medidas adoptadas

• Incorporación dun punto adicional de auga mediante un avituallamento portátil.
• Dispoñibilidade dunha saída rápida cara á estrada en caso de asistencia ou evacuación.
• Reforzo das medidas de control e seguimento ao longo da proba.
• Incremento dos tramos con sombra, cun 85 % aproximado do percorrido baixo cobertura arbórea total ou parcial.

Perfil do percorrido

O percorrido resultante presenta un perfil moi accesible para a distancia proposta. A ruta conta cun desnivel positivo acumulado de aproximadamente 390 metros, dos cales arredor de 200 metros concéntranse nun tramo duns 6 quilómetros de ascensión progresiva e constante. Trátase dunha subida longa pero moi tendida, sen pendentes excesivas nin dificultades técnicas destacables agás en 180 metros.

Unha vez superado o punto máis alto do percorrido, os participantes atoparán maioritariamente tramos de baixada ou de perfil suave ata a meta, o que contribúe a facer a ruta máis cómoda e levadeira.

Avituallamentos

Os participantes disporán de puntos de avituallamento con auga, froita e hidratos de carbono nos quilómetros 4, 7, 12 e 22. Ademais, habilitarase un punto portátil de auga no quilómetro 17, accesible mediante vehículo de apoio.

Tramo con vexetación

Este cambio obriga tamén a transitar por un pequeno tramo duns 120 metros con vexetación á altura dos xeonllos. Aínda que foi rozado manualmente con fouciños, debido a que a maquinaria non podía acceder á zona, a organización informa deste aspecto para que os participantes extremen a atención nese punto concreto. Trátase dun tramo curto, perfectamente transitable e sinalizado.

No resto do circuíto, o Concello de Friol realizou un importante esforzo de acondicionamento e limpeza, para que o percorrido se atope en condicións óptimas para a práctica do sendeirismo nos 36 km que suman as distancias de tramos nos coincidentes dos dous circuitos.

Sinalización do percorrido

• 83 estacas e carteis direccionais.
• 153 marcas de pintura azul e branca como mínimo.
• 14 marcos quilométricos do Camiño Real pertencentes á Rede de Sendeiros do Concello de Friol.
• 52 cintas identificativas verdes de Caixa Rural colocadas en árbores e puntos estratéxicos.
• 42 bandeiras verdes.
• 37 bandeiras vermellas.

Recursos de hidratación e alimentación

• 4 fontes sinaladas.
• 40 packs de auga de 6 botellas de 1,5 litros.
• 50 packs de auga de 5 litros.
• 50 kg de plátanos.
• 20 kg de mazás.
• Barritas de cereais, metade de chocolate e metade de arandos.
• Gominolas.

Produtos locais nos avituallamentos

• Bica.
• Pauciños de pan.
• Enchidiños de chourizo.
• Torradas de Madialeva.

Así mesmo, na web MarchaNordica.es está habilitado un botón de WhatsApp para que calquera participante poida contactar directamente coa organización antes ou durante a xornada en caso de necesidade, dúbida ou incidencia.

Algúns modelos meteorolóxicos contemplan tamén a posibilidade de precipitacións a partir das 13:00 ou 14:00 horas, polo que a organización continuará realizando un seguimento permanente da evolución do tempo ata o inicio da proba.

A organización considera que estas modificacións permiten manter o atractivo deportivo e paisaxístico da proba, mellorando ao mesmo tempo as condicións de seguridade e confort para todas as persoas participantes.

Recomendacións

Recomendamos acudir con gorra, protección solar de alto factor, lentes de sol e hidratación suficiente, así como seguir en todo momento as indicacións da organización e do voluntariado distribuído ao longo do percorrido.

Agradecemos a comprensión e colaboración de todas as persoas participantes e agardamos que todos poidamos gozar dunha magnífica xornada de sendeirismo en Friol.